| تبليغات | X |
گزیده غــــزل آذربایجان
AZERBAYJAN GEZELI
اولدوز ساياراق گؤزله ميشم هر گئجه ياري
گئج گلمه ده دير يار ، يئنه اولموش گئجه ياري
گؤزلر آسيلي، يوخ نه قارالتي، نه ده بير سس
باتميش قولاغيم، گورنه دوشورمكده دي داري
ياتميش هامي، بيرالله اوياقدير، داها بيرمن
مندن آشاغي كيمسه يوخ، اوندان دا يوخاري
شهريار
******************************************
ودود دوستی"ايلقار"
(زیتون ایشیفیندا مجموعه سیندن ایکی غزل)
دادلیم
عشق بیر تعبیره سیغماز یوخو،من لال،دادلـــــیم !
عاشق اولسان دوشونرسن نه دی بو حال،دادلیم !
من بو کرواند،بو داغ-داشدا یورولــدوم،بسدیر
سنه چاتمیرسا بو یول،ساخلا منی سال،دادلیم !
آجی اؤلمکدی بو سنــسیز یاشاماقــلار،دوزلوم !
و حیات سنله بیلیرسن نه دی؟ بال...بال،دادلیم !
بو ائوین پنجـره سـی،پرده سی سنسیز داریخـیر
سیل بو گؤزیاشلاریمی،بوردا اؤزون قال،دادلیم !
قیناما،قلبینه گول،قلبیمه پروانه دئسه
اوددان،اود تک یئتیشندن نه بیلیر کال،دادلیم !
...اوره کده داغ
اوره کده داغ،باشیمین اوسته چن دولاندیریرام
و بیلمیرم کیمه خاطیر،نه دن دولاندیریرام
گئدیب حرمده گؤیرچینلرین قانین گؤره لی
سحرلی سئرچه لر آردینجا دن دولاندیریرام
هله بئش-آلتی غزل یول قالیر سئوینج ائوینه
اودورکی بیر شله بیت الحزن دولاندیریرام
سینه مده سئوگیلیمین عشقی وار غریب دئییلم
و قوی دئییم کی اؤزومله وطن دولاندیریرام
بو قیش حیاتدا کدرلرده کؤوره لیر "ایلقار"
اورکده داغ،باشیمین اوسته چن دولاندیریرام .
***************************************
محمد رضا ملک پور(ناظر شرفخانه اي)
شئهلي سـحر مجموعه سیندن :
1
دئميرم گئتمه،منيم فيکريمه قال،گدسن گئت
ماراليم گل،يازيغام، جانيمي آل،گدسن گئت
سئوگيسيز،سئوگيليسيز سينه نه لازيمدي منه؟
گل بو بوش شيشه ني آل، داشلارا چال،گدسن گئت
بدنظر پؤرته له يه راي قوزو،قوربانين اولوم
گؤز نظر تک قولومو بوينونا سال، گدسن گئت
ايندي کي اي گؤزو گويچک،مني ترک ائتملي سن
بير قاييت باخ دالييا،مثل مارال گدسن گئت
آل منيم سينه ده بير قيرميزي مرجانيم وار
آس گيلان بوينونا،بوينوندا مدال گدسن گئت
گؤز ائوين آينه بندان ائله ديم اشکيمله
باري گل بوردا قوناق بير گئجه قال گدسن گئت
گؤزليم،«ناظره» سنسيز ياشاماق فاجعه دير!
رحم ائله،رحم ائله،گل جانيمي آل، گدسن گئت.
2. دنيز دنيز دوغولوبدور ...
بير آتلي گئچدي بو يولدان،يئرينده ايز قالدي
کيم ايزله دي اونو آنجاق،گؤزونده توز قالدي
گونش کيمي منه بير يول اؤته رگي ائتدي نظر
آلوولار ايچره ياخيلديم، سينه مده کوز قالدي
بيرآندا ايتدي گؤزومدن،آخان ستاره کيمي
خيالدا خاطره لردن هميشه سؤز قالدي
آخان ستاره دئييلدي ،کؤچه ن بهاريميدي
گؤزومدن ايتسه ده،داييم يولوندا گؤز قالدي
چوخ ايسته ديم داليسينجا قاچام، دئيه م:گئتمه!
ديزيمده اولمادي طاقت،ديليمده سؤز قالدي
منيم ده آرزي نهاليم ياز اولدو ديرچلدي
ولي آچيلمادي هرگز شکوفه سيز قالدي
غم ائتمه،داملا دامارکن ايته ر ،باتار ناظر!
دنيز دنيز دوغولوبدور ؛دنيز دنيز قالدي
ناظر شرفخانه اي
حسين ظابط :
عالمده هئچ اوره ک بئله سئوداده يانماسين
بير کافرينده وارليقي يئر سيز تالانماسين
هجراندا اود سالار اوره گه يار فرقتي
چاتميش وصاله آيريليقي ساده سانماسين
هيجران چکن بلا گؤره ن آواره کيمسه لر
عاشق وفا دوز عهده ياناشدير اينانماسين
سؤيله نگاره ياندريجي عشقي دانسادا
لوح وفاده يازديقي ايلقاري دانماسين
ائدسه بولانتي ياز سئلي ويرانه يوردومو
من صاف اوره گلي عاشقه گؤنلو بولانماسين
سئودا مرامي سينسيمه دير ياره سؤيله يين
هر بير اؤترگي اينجيمه لردن اوصانماسين
اولموش بلالي خاطره لر يوردو تار و مار
تاپشير او قانلي يايلاغا بير آن دولانماسين
قارلار دومانلي زيروه سي ضابط جاوانليقين
الدن گدينجه عشق بهاري يوبانماسين
قيام اسلامي :
کاغيذ قلم و رويالاريم داغيليپ ديرميز اوستونه
غزل غزل تمنالاريم داغيليپ ديرميز اوستونه
يئل آغلاديقجاماهني لارين، پاييزي تامسينير حيات
سولوبدو كورپه غنچالاريم داغيليپ ديرميز اوستونه
ساعات چيراق لاتين يازيلار و او سن سئوديگين كاسئت
اينان اينان كي دونيالاريم داغيليپ دير ميز اوستونه
بو آيريليق سطير لرينه نه قدر دولدوروم سني؟
قاييت قاييت كي قوشمالاريم داغيليپ دير ميز اوستونه
!اتاق آچيبدي قوللاريني و سني گوزله يير خانيم
باخين عطيرلي آلمالاريم داغيليپ ديرميز اوستونه
و سن كي بير زامان قاييديپ گوره جك سن اوزوم يوخام
تامام سينيپدي ووتكالاريم داغيليپ ديرميز اوستونه
وسونرا بلله نه جك جانيمي وورموشام اودا
يانيپ بوتون قابيرقالاريم داغيليپ ديرميز اوستونه
باتيپ گوناهسيز اللريمين كولونه شكليوين قابي
كاغيذ قلم و رويالاريم داغيليپ دير ميزاوستونه
و سن نه جوركي گلميشيدين گئدهجك سن آخيردا تك
منيم جوابسيز آيالاريم داغيليپ ديرميز اوستونه !
وحید طلعت:
چوخ ايسته ييردي دئسين:
- گئدمه يين ،
- اولارسا قالين!
- چوخ ايسته ييردي قالا! ، آمما کيم بيليردي حالين؟! -
: دمير يولون دوراقي؛ آلتي ني گئچير بير ربع
ياغيش ياغيبدي آچيبدي وَ گوي بويالي شالين ...
آچيبدي گوستريب ايندي و بيزده آيريليريق...
- باخيشلارين آپارارکن ... مني اليندن آلين!
*
قاطار گدير و اؤزويلن سني چکير آپارير
قاطار گئدير و باشيمدان چئخير سنين خيالين
: ساعات بئش آلتي دقيقه؛بئش آلتي ايل يوبانير...
و گوي چکيب باشينا اوندادان بويالي شالين.
سحر خانیم:
دوداقلاریمدا آمان قوللاریمدا غم قالدی
باخیشلاریمدا کدر گوزلریمده نم قالدی
دئدیم جانیم آجیشیر گئتمگیم گلیر، گئدیرم
یولومدا دوردی غمین ایسته دیم گئدم، قالدی
(بیر دسته تزه گونش مجموعه سیندن)
پالتارین جان سویور، نه جور اونودوم؟
جان جانیندان دویور،نه جور اونودوم؟
بویورورسان اونوت ، باش اوسته ، ولی
سنی من ، سن بویور نه جور اونودوم؟!
