بیر یئنی غزل

محمد جواد آسمان ، ایصفهانلی شاعیردن :

                "واي‌قوش" ليق!

واي‌قوش! سَن آلّا يات...مَنَه "واي" دا قوناق دَگِر

هِش‌نَه بو اوي ييخِلماق دان آجّي راق دَگِر

نِيليم؟ دِمَه اؤخو...اؤخوماق آغلاماق ايسَر

كيمنَن سَرِه اُخيم؟ بيري بوردا اوواق دَگِر

كَنديم عاشيق لَري ِ توتولوب تؤركو ديل لَريِ

آتا اُلَن گلين ليگينه اويناماق دَگِر

اولدوز يالان دِيير...گِئجَه گوندوز يالان دِيير...

آيِه اينانميرَم؛ اورَگيم دا اوشاق دَگِر

داغلار داليندا ايلدِئريميم  يوخ بولوت تَكين

بيرنَه دايانميبَم...مَنَه هِچكيم داياق دَگِر

...واي‌قوش اوخير...دِيير اوچَم و بيريانا كُچَم

...گرچك دِيير...اؤلوم  بئِلَه بوردان ايراق دَگِر.

بو منه بیر خاطیره‌لی غزل اولسادا...  دوستومون بو یارالدیغی تهرانین ایستی آخشامیندا یئنی بیر حس اولدو ...ائله بیل بو دویغو ایللرایدی ایتگینیدی ، ائله بیل بو دویغو ایللرایدی دیدرگین دوشموشدو ... داها دا بونو گؤزله‌مه‌ک اولموردو ...آما بولارا باخیمیاراق و گئچمیشلری اونودماق باخیشیلا بو شیعر اؤز نوبه سینده  منیم باخیشیملا بیر یارادیلمیش اثر ساییلیر .اودا بیر اینسانین دیلیندن کی آنا دیلین دوغولماقیندان چوخلی قاباق اونودموشدو  و دوغولماقیندان بری بو دیلده دانیشدیغی و یازدیغی اولمامیشدیر .

"جواد آسمان" ایصفهان تورک‌لریندن اولسادا ، بو تزه ایللرده  اونون فارسجادا یازدیقلاری  ایرانین یئنی ادبیاتیندا(غزل جریانیندا) گؤزه گلندیر و اؤزونه بیر خصوصی یئر آچمیشدیر ... آسمانین باخیشی و دویغولاریلا  ایللردیر یاخین بیر دوستلوقوم وار و بونو باشادوشموشم کی  اونون شعر و فلسفی باخیشی (بیر یئرده)  آرتیقراق بیر یئنی لیگه  مالیکدیر .

...

بو سؤزون سونوندا گله جکده آسمان و داها آسمانلارین تورکجه یازماغ و اؤخوماغلارینا گؤنمه‌لی‌یم و بئله بیلیرم کی بیر گؤن ایرانین بوتون تورپاقلارینداکی تورک خالقی (فارسجا ادبیاتی دؤشونندن سونرا) اؤز طالع لریله (دیل،کولتورو داها اونودولموش  تاریخلریله) یئنی دن باریشمالیدیلار.