| تبليغات | X |
|
سن سیز گؤزلرین اوتانیر ، باخا اوزومه سؤزلرین تیترهییر ، سویوق سسینده . دئییرسن کی سئوگین ، بیتیب دیر داها نه فایدا یاشاماق ، درد اتگینده ؟! پاییزدیر سویوق دور ، هاوادا ـ سنده آغزیندان آیریلان ، دونور هاوادا . باخیرسان اوزوم دهن ، باشقا هریئره قولاغیم سندهدیر ، اورهییم داردا . بوداغدان آیریلیب دوشن هر یاپراق ازیلیر یولوندا گؤز یاشیم سایاق . دوشونور اورهییم نئجه دیر آللاه ائدیبسن بیر قولو بیرینه قولچاق !! دئییرسن اویوندو اولوب کئچنلر دئییرسن ؛ گئت اونود دوشونمه منی دئییرسن آمما هئچ بیلمیرسن یازیق بو ازیب کئچدیگین ، سئومیشدی سنی . باخیرسان اوزوم دهن باشقا هریئره قیش سایاق سویوق دور خومار گؤزلرین . اوزولوب الیم دهن گئدسن ده بیرگون بیلیرهم ایچیم ده قالار گؤزلرین . اللرین تیتره ییر آمما بیلمیرهم نهدندی اوتانمان ، یوخسا سویوق دان؟ بیر پاییز گونودور ، گون باتیر داها آیریلیق زامانی ... سؤز آیریلیقدان . ــ ائله بیل تله سیر اؤلمهیه بوگون ــ نفسیم گؤزومون اؤنون باغلاییر هؤیوشنه توتساغی یازیق اورهییم دئوره شیر اؤزونه ، گیزلین آغلاییر . باخیرام اوزونه بلکه سون دفعه گؤرورهم گؤزلرین هله یاشیل دیر . بیلیره م باشیمدان گلیب کئچنلر بختیمه یازیلان غملی ناغیل دیر . باخیرام اوزونه ، گولورهم آنجاق اوره ییم ایچیمده پارچا پارچا دیر . باخیرام اوزونه ، گولورهم آمما اوزومده گول آچان گولوش یارادیر . توتورام یولومو سن دهن آیریلیب کوچه لر آدام سیز ، کوچه لر سس سیز . اؤنومده اؤته سیز ، قارانلیق ایللر آرخامدا مین بوداق ، اینجیمیش نرگیز . یورورهم ازیلیر آیاغیم آلتدا باهارین هلهده ایستی گؤزلری. باشیمین اوستوندهن کئچیر بولوتلار ایچیمده قارالیر اومود کؤزلری . بیلیرهم سنایله یادا کی سن سیز کئچه جک بو عؤمور ، بو قارا گونلر . گولهرهک آیریلدیق آمما اینانما کؤنلومه سالدیغین بو آتاش سؤنهر . قانیمین ایچینه گیرهن وفاسیز! چیخاریب منی ده ، کؤنلوندهن آتدین . سویوق بیر گؤزگونو ، یارپاغلار کیمی اؤلدوروب آخیردا قیش لارا ساتدین . اوزولدوم اؤزوم دهن آیرییام سن دهن گؤردوگوم اؤزگه لیک ، هر تانیش دا یاد بیر حسرت کؤنلومه یادیگار قویدون آغلیرام آزالمیر دردیمدهن هئچ زاد . کیم دئییردی سئومک یاساق دئییل دیر یاشاییب من گؤردوم ، یاساق دیر یاساق . دولانیب دیله نیب دامجی دامجی درد اوره ییم ایلله نمیش چاخیر دیر آنجاق . قولاغیم دویدوغون داندیغی کیمی گؤزلریم گؤرمه گی دانیرلار داها او قدهر خیانت گؤردوم دونیادا ایندی ده قورخورام باخام آرخایا . باشیمین اوستونده هله ده دردین حسرتین کؤنلومه ایدیریبدیر دیز . گون لریم قاپ قارا ، تالان دیر عؤمروم سن سیزم ، سن سیزم ، سن سیزم ، سن سیز ... مینا جلیل زاده |
