| تبليغات | X |
اورمونون گوجلو شاعيريندن ايكي شعر
حميد واحدي
ائلیمین غصه سین آغیر محنتین قویسالار بئلینه داغلار چکنمز
توکسه لر نیسگیلین آخان چایلارا آغلایار کدردن، چاغلار چکنمز
***
دردیمیز شاختالی باغین دردی دیر اوز ایچینده یانان داغین دردی دیر
چاغداشیق دردیمیز چاغین دردیدیر بو چاغین دردینی چاغلار چکنمز
***
میراث تک بولونوب پارچالانمیشیق حسرت اوجاغیندا قارسالانمیشیق
یانمیشیق، یانمیشیق، یئنه یانمیشیق داغلار چکمیشیق کی داغلار چکنمز
***
نه بویاقلارداندیر ائلین ماتمی هیچ رسام چکنمز بیز چکن غمی
داوینچی الینه آلسا قلمی قره لر اوخشایار آغلار چکنمز
***
نه باغدیر، نه باغدیر ائلیمین باغی نیه من بو باغا اوخویوم آغی
شاختادا، بوراندا بار وئریر تاغی بو سویوق،شاختانی باغلار چکنمز
پنجره لر
گؤرسه دير بيزلره مدّتدي يالان پنجره لر
درده باخديقجا بيزي درده سالان پنجره لر
بعضاً آيينه اؤلوب محو اؤلوروخ اؤنلاردا
ياشاسين بيزلري بيزلردن آلان پنجره لر
بيليرم اؤلكه ده دير چلسه ياشيلليق نفسي
آچيلار اؤندا بوتون باغلي قالان پنجره لر
ايسته رم گؤرميه گون، پرده لر آرديندا قالا
آيريليق ماهني سيني گونده چالان پنجره لر
سؤرورام خلقه باخاركن اؤز اؤزومدن، گوره سن
يئنه ده گنجله شر بو قؤجالان پنجره لر
حافظين ديواني نين پنجره سين تا آچيرام
آچيليرلار اوزومه باغلي قالان پنجره لر
حميد واحدي
