| تبليغات | X |
|
سوْن پاییز: (1) آنی لار اؤلوملو ، آنی لار آجی ساعاتلار قورتولماز ، ساعاتلار آغیر شوشهنین تَرینه گؤزوم تیکیلب دیهسَن کوچهیه قارا قار یاغیر *** بو چیلله گئجهسی ، بو قیش آخشامی باخیرام گِئد به گِئد کؤلگَم اوزانیر سئوگیسیز یاشاماق عادت اولاندان اؤزومدن کِئچرکن کؤلگم یوبانیر *** بیر نفر بویلانیب کِئچمیشلریمدَن آرزو مَزاریندان باخیر صاباحا اوزونده بیر داملا دنیز گؤیهریر شوشهنین تریلَن آخیر صاباحا *** ایچینده ائلهبیل حیات گؤونهییر یازیق اَللَریله گؤزون اُوکالیر کوچهدن کِئچیر او سَسسیز، سَمیرسیز آغارمیش سؤزونده غمیم ایز قالیر *** حَیَطده نه یازیق اؤلوم تهلهسیر اُتاقدا دووارلار یامان داریخیر نیسگیللر دونیاسی ...ـ آمان یِئل اَسیرـ باشیما اوچارکن ئهویمی ییخیر *** چیللهنین شاختاسی بورویور منی دیلیمده سؤزلریم دوْن آتماقدادیر جان آتیر بیر نفر سنه یئتیشسین... بو سَفَر بو یولدور کی چاتماقدادیر! *** بِئله بیر زاماندا ، بِئله بیر آندا اوچورام خیالدا سَنه گَلیرم گَزیرَم آردینجا یوللار اوزونون روحوملا بو حالدا سَنه گَلیرم *** (2) گئجهنی سوواراق ، گؤنَش دوغارکَن ایکی کؤلگهییدیک خَلق آراسیندا بیریمیز حوزونلو بیریمیز آسلی ایکیمیز دیدرگین دیل یاراسیندان... *** تبریزین سوْن قیشین خاطیرلادیقجا بیر سویوق اؤشوتمه بیزی تیترهدیر "وئرگول"لر دونیاسی بیزی آیریلدیر نهبیلهک یاشاماق نه دندیر ، نهدیر؟! { وئرگول : (،) } *** ایکیمیز آردیجیل آیاقلاشیریق دوستاقدان دوستاقا آیاق قویماغا یئنهده باخیریق ... بورا... تبریزدیر آنیلار مزاری... نه وار دویماغا...؟ *** تاریخی اونودماز ، نیسگیلی آغیر بیر یانان "ستارخان" باخیر تبریزه بیر یانان "باقیرخان" قاییدیب گلیب ائشیدیب اؤلموشوک ... آغلاییر بیزه! *** بیرداها دؤنوروک کِئچَن گؤنلره گؤزلردن ائلهبیل آرازدیر آخیر بو شَهَر ، بو سئوگی ، بو سوْن طالِعیم اونودور منیده.... یالنیز بوراخیر. *** ... گلیرم اوزومله ساعات آلتیدا "ساهات میدانینا" گؤزوم ساتاشیر نه گؤنلر سورموشم بوردا کِئچنلر باخدیقجا ، دویدوقجا... گؤزوم قاماشیر *** ایچیمدن بیر سرین یئل اَسمهکدهدیر ایز قویوب آرزولار آیاقلاریمدا دیلیمه گلمهدَن سونونجو پاییز آتامین آدیدیر دوداقلاریمدا... : *** آتالار ناغلیندا یاتسادا بختیم اویاندیم حیاتلا قارشییا چئخدیم دوورالار دالیندان دیرچهلیب باخدیم؛ ساغیمی کوْرلادیم ، سولومو یئخدیم *** ایچیمده هؤووشنه ، سسیمده قورخو اؤزومو ... اؤزومله اینان بولدوروب آغلاییر ، هونکورور اوخشاییر منی قلبیمده بیر آرواد آرین اولدوروب! *** آنلیمین یازغیسین یازدیران زامان طالعیم قارادان قارا یازیلمیش آرزولار یئرینه یازیق قلبمیده بیر درین ، داریشیق قبیر قازیلمیش *** منده ایللر بویو بیر قوجا... قری اوغلونون یاشیدک نیفرت یاشادیر ایچیمده او یازیق هایخیریرمنه: ـ سنی بوندان بری قیسمت یاشادیر!ـ *** (3) اولدوزدان اولدوزا اوزون گئجهلر یولونو ایزلیرم اوزون گئجهلر بیلیرسَن بو اوچ-بئش گونلوک حیاتدا نئجه سنسیزلیرم اوزون گئجهلر *** ائلهبیل گؤزومدن اولدوز اَلهنیر هر گئجه بیر اولدوز گؤیومدن آخیر قورخودان دؤرد اَللی تَلهسیک روحوم طالعی قوجاقلیر ، منی بوراخیر *** دییرلر آرزولار قورتولان زامان انساندا دویغولار عقله یوکسهلیر آرزوسون بیتیرمیش اینسان نهدندی عاغیل سیز، دویغوسوز گؤزیاشین اَلیر؟ *** عدالت اومورام سنین سؤزوندن آغلیرام ائلیمه ، قارا باغلارا قلبیمی باغلیرام آیاقلارینا کونلومو وئریرم اوجا داغلارا. *** سئوگیلیم حیاتیم قورتولان زامان بیر گؤیرچین منی سنه گوتورور! بو یانیق اورگیم اللرین کیمی حیاتی توتدوقجا ... منی اوتورو *** نه یازیق طالعیم ، نه ایوالیم وار بیرگؤنوم یاسلی دیر، بیریسی پای سیز آما تکجه سَنسَن آییم اولدوزم یاشاماق اولارمی اولدوزسوز ، آیسیز؟ *** عاشقیق سازیلا سوزو بیرلهشیب یادیما گتیریر "چنلی بئل"لری سؤزلریم توکولور غزللریمه اوستومه یئل اسیر؛ ائلیمین یئلی! *** بیر آددیم یئردهیم بیرسی گؤیده گلیرم یئنهده من سنه ساری اورگیم تلسمه یورو یوللاری بوسفر باسارام باغریما یاری *** سسیمی دویدوقجا آتا داغلاریم آنامین یوردوندا حوزون محو اولور اوتاقدا عکسینی چکندن بری... سنی گؤرجَک منیم گؤزلریم دولور. *** گلیرم بو سحر سنین اوستونه نئجه یول یورقونو سفری خوشلار نئجه یار بسلهین دؤزَر آجییا اینتیظار چَکَن گؤز خبری خوشلار... *** یوخوما گلیرسن اؤلوم دیریلیر. دیلمه گلیرسن حیات یارانیر. اؤزـ اؤزه ساتاشیر یئنه گؤزوموز ساعاتلار یوبانیر ، زامان دایانیر. *** *** وحید طلعت آذر 86
|
